‘माझी लाडकी बहीण’ योजनेत पैसे मिळवणाऱ्या अनेक महिला सप्टेंबर महिन्याच्या हप्त्याची आतुरतेने वाट पाहत आहेत. पण सप्टेंबर महिना संपायला काहीच दिवस उरले असूनही अजून पैसे जमा झालेले नाहीत. त्यामुळे या महिन्याचा ₹१५०० चा हप्ता उशिरा मिळण्याची शक्यता आहे. मागील काही महिन्यांप्रमाणेच या वेळेसही महिलांना थांबावे लागणार आहे.
सप्टेंबरचा हप्ता उशिरा का येतोय, याबाबत महिला आणि बालविकास मंत्री अदिती तटकरे ह्यांच्याकडूनच माहिती दिली जाते. पण अद्याप त्यांनी कोणतीही अधिकृत घोषणा केलेली नाही.
मागील महिन्यातील अनुभव पाहिला तर ऑगस्टचा हप्ता देखील सप्टेंबरमध्ये उशिरा मिळाला होता. त्यामुळे सप्टेंबरचा हप्ता ऑक्टोबरच्या पहिल्या दोन आठवड्यांत कधीही जमा होऊ शकतो, अशी शक्यता सांगितली जात आहे. मात्र नेमकी तारीख सरकारकडून घोषणा झाल्यावरच कळणार आहे.
दरम्यान, या योजनेत एक मोठा मुद्दा समोर आला आहे. नियम मोडून सुमारे ८ हजार सरकारी महिला कर्मचाऱ्यांनी देखील या योजनेतून पैसे घेतल्याचे आढळले आहे. त्यामुळे सरकारने आता त्यांच्यावर कारवाई करण्याचा निर्णय घेतला आहे. त्यांच्याकडून जवळपास १५ कोटी रुपये वसूल केले जाणार आहेत.
खऱ्या लाभार्थी महिलांना यामुळे घाबरण्याचे काहीच कारण नाही. त्यांना पैसे नक्की मिळतील. मात्र, कुठल्याही फसवणुकीच्या प्रयत्नांपासून सावध राहावे, असे आवाहन सरकारने केले आहे. सप्टेंबरचा हप्ता कधी जमा होईल याची माहिती मिळाल्यानंतर, पात्र महिलांच्या खात्यात पैसे लगेचच जमा होतील.